TIRANE, 11 dhjetor/ATSH/- Dhjetëra qytetarë të mbështetur nga PD kanë bllokuar pasditen e sotme, disa akse rrugore në vend, në shenjë proteste kundër çmimit të karburantit.
Të mbështetur nga PD, qytetarët bllokuan për disa minuta autostradën në Durrës, aksin Fier-Vlorë dhe aksin Korçë-Pogradec. Protesta u raportuan edhe në Shkodër, Lezhë, në Rrugën e Kombit, por edhe në zonën e Milotit.
Edhe në Korçë dhe Devoll, siç raportohet, protestës që mbështetet nga PD dhe LSI i janë bashkuar edhe fermerët.
Në lidhje me këto protesta, ka reaguar Kryeministri Edi Rama.
“Eh Artist si e katandise opozitën! Të rinjtë e PD maskohen si studentë, se ndryshe i përzënë; dega e Fierit zë rrugën me jelekë të verdhë sikur i merr porositë nga Parisi; bashkia e Kukësit shfaqet si grup biznesmenësh të vegjël që duan dyqan pa kasë; ndërsa ti vetë te Astir Boja”, shprehet Rama./a.g/
