TIRANË, 13 nëntor/ATSH/- Zëvendëskryeministrja Senida Mesi mori pjesë sot në takimin e radhës të grupit të punës për Ballkanin Perëndimor, organizuar nga Komiteti Europian i Rajoneve dhe bashkia Tiranë, për të diskutuar mbi reformën administrative në nivel europian, rajonal dhe vendor.
“Organizimi i ri territorial në 61 bashki, ka kontribuar direkt në: forcimin e kapacitetit të tyre për ofrimin e shërbimeve më cilësore; rritjen e eficiencës së bashkive në menaxhimin e burimeve lokale; mbledhjen më efektive të taksave dhe tarifave dhe ofrimin e mundësive më të mira për promovimin dhe nxitjen e zhvillimin ekonomik lokal të qëndrueshëm”, – theksoi Mesi.
Sipas saj, qeveria shqiptare ngelet përherë e gatshme për të bashkëpunuar me pushtetin vendor me qëllim garantimin e autonomisë së vetëqeverisjes vendore.
“Do të punojmë së bashku, për një administratë publike qendrore dhe vendore të standardeve europiane, me fokus ofrimin e shërbimeve publike cilësore ndaj qytetarëve tanë”, – shprehet Mesi./k.s/j.p/
