TIRANË, 17 tetor /ATSH/ – Lufta kundër korrupsionit është ndër prioritetet e qeverisë shqiptare, u shpreh Ministri për Europën dhe Punët e Jashtme, Ditmir Bushati, në një takim me Përfaqësuesen e Posaçme të Kryesisë italiane të OSBE-së për Luftën kundër Korrupsionit, Paola Severino.
Ministri Bushati vlerësoi bashkëpunimin midis Shqipërisë dhe Kryesisë italiane në të gjitha dimensionet e veprimtarisë së organizatës.
Ministri Bushati i bëri me dije Përfaqësueses së Posaçme të OSBE, Severino, se lufta kundër korrupsionit është ndër prioritetet e qeverisë shqiptare dhe me këtë rast, informoi arritjet e Shqipërisë në këtë fushë, si dhe sfidat me të cilat ajo ndeshet.
Të dy palët theksuan rolin e reformave në vend dhe thellimin e tyre në formimin e kulturës për tolerancë zero ndaj mosndëshkueshmërisë.
Gjatë bisedës u diskutua dhe kontributi i organizatës për forcimin e paqes dhe sigurisë në rajonin tonë, përmes nxitjes së bashkëpunimit për një zhvillim të qëndrueshëm e gjithëpërfshirës.
Ne këtë takim ishin të pranishëm edhe ambasadori i Italisë në Shqipëri, Cutilio, vendi i të cilit mban Kryesinë e radhës së OSBE, ambasadori Borchardt, Shef i Pranisë së OSBE në Shqipëri, etj.
/gj.mima/j.p/
