TIRANË, 9 Tetor /ATSH/ -Kampionët e Gjermanisë, Bayern Mynih po kalojnë në një krizë rezultatesh. Humbja 0-3 në Allianz Arena kundër Borussia Monchengladbach e ka rënduar akoma më shumë gjendjen tek ekipi gjerman, ku tranjeri Niko Kovaç cilësohet si fajtori kryesor për rezultatin e tretë negativ radhazi në kampionat.
Gjithsesi, presidenti Uli Hoeness ka deklaruar në një intervistë se do ta mbrojë deri në fund trajnerin kroat, dhe situata është mjaft e qetë, pavarësisht gjërave që fliten.
Por, kjo deklaratë nuk i ka penguar mediat gjermane të aludojnë për kandidatët e mundshëm për stolin e Bayern. Emrat që pëlqehen më shumë nga drejtuesit janë ata të francezëve Laurent Blanc, Zinedine Zidane dhe Arsene Wenger.
Ka spekulime se brenda ekipit ka probleme mes ish-tranjerit të Eintracht Frankfurtit dhe disa prej lojtarëve më me peshë brenda skuadrës, të pakënaqur për minutazhin e pakët në dispozicion. E kjo nuk është hera e parë që kjo gjë ndodh, me Pep Guardiolan e Carlo Ancelottin, të cilët kanë pasur në të kaluarën të njëjtin problem. Mbetet të shihet nëse pas pauzës së kombëtareve, gjërat do të kthehen në vendin e vet, apo Bayernit do t’i duhen ndryshime në stol.
/gj.m/j.p/
