TIRANË,18 shtator /ATSH- I. Vata/ – Ambasadori i ri i Delegacionit të Bashkimit Europian, Luigi Soreca i paraqiti Letrat Kredenciale Presidentit Ilir Meta.
Presidenti i Republikës, Meta pranoi sot Letrat Kredenciale të Ambasadorit të ri të Delegacionit të Bashkimit Europian në Tiranë, Luigi Soreca.
Në takim, Presidenti Meta shprehu kënaqësinë që Bashkimi Europian ka përzgjedhur si përfaqësues të tij në vendin tonë një nga njohësit dhe bashkëpunëtorët më të afërt të Shqipërisë dhe rajonit ndër vite dhe me kontribut të spikatur për suksesin e liberalizimit të vizave me BE.
Po ashtu, Meta theksoi se përparimi urgjent në çështjet e shtetit të së drejtës dhe zhvillimit të qëndrueshëm ekonomik janë domosdoshmëri për vendin dhe përshpejtojnë axhendën integruese të vendit.
Kreu i Shtetit nënvizoi rëndësinë e dyfishimit të përpjekjeve të brendshme dhe rritjen e bashkëpunimit pozitë-opozitë për avancimin e reformave kyçe që do të mundësojnë realizimin e objektivit për çeljen e negociatave vitin e ardhshëm. /a.g/
