PRISHTINË, 14 gusht/ATSH/ – Prizreni nga sot ka parkingun e parë publik me kapacitet për 100 makina, prapa Shtëpisë së Bardhë.
Për shkak të afërsisë nga qendra historike, parkingu do të shërbejë veçanërisht për vizitorët dhe bizneset e Çarshisë së Bazhdarhanes, duke zbutur kështu një problem shumë të theksuar për zhvillimin e turizmit dhe të biznesit për 400 dyqane që veprojnë në këtë zonë.
Kryetari i komunës së Prizrenit, Mytaher Haskuka, bëri të ditur se “deri në fund të vitit, kemi parashikuar që parkimi në këtë vend të jetë falas për 3 orë, ndërsa në të ardhmen do të caktohet një tarifë, gjithsesi shumë e volitshme”.
Në të ardhmen, shtoi ai, në këtë vend planifikojmë të ndërtojmë një parking nëntokësor për 400 automjete, gjë që do të bënte një zgjidhje të përhershme për vizitorët në këtë zonë. /k.s/
