https://www.facebook.com/edirama.al/videos/10155972212741523/
TIRANË, 20 korrik/ATSH/-Kryeministri Edi Rama duke vënë theksin tek investimet e kryera në spitalet rajonale të vendit, është kthyer 4 vite pas për të kujtuar gjendjen e dikurshme në të cilën ato ndodheshin para investimit të Qeverisë.
Përmes një videoje, ku shihet transformimi i spitalit rajonal të Elbasanit, Rama thekson se ka ende shumë për të bërë në drejtim të shëndetësisë, ndërsa ka ndarë projektet e reja që do të nisin.
“As bëhet fjalë që kush na shan e na mallkon për spitalet një arsye edhe e ka, po ama sikur të mos harrojmë fare fare se nga u nisëm vetëm katër vjet e gjysëm më parë , nuk do ishte keq, si thoni(?) dhe pastaj flasim sa të duam për çfarë ende mungon e për sa shumë akoma kemi për të bërë”, -shkruan Rama.
Përmes pamjeve në video, thuhet se “investuam në ambiente pritëse për pacientët dhe qytetarët, siguruam barnat dhe materialet kryesore bazë, aparatura të reja në shërbimin e Urgjencës. Sistem referimi për shërbimet e specialiteteve, vetëm në një muaj 5181 pacientë përfituan shërbimin në kohë dhe pa sorollatje. Epokë e re për kirurgjinë: instrumente të rinj kirurgjikalë dhe shërbim modern sterilizimi. Përmirësojmë shërbimin e kirurgjisë për 2700 pacientë në vit. 1 milion euro investime në pajisje mjekësore., grafi e lëvisshme, inkubatorë të rinj për maternitetin, set i ri për shërbimin e Okulistikës. Shërbime ndihmëse për pacientët. Transformohet pediatria, 9202 fëmijë marrin shërbimin në kushte moderne. Kemi ende shumë për të bërë. Projekte të reja së shpejti instalohet rezonanca magnetike, ndërtojmë Spitalin e Urgjencës dhe Patologjisë. Puna vazhdon”.
z.tosku/ /a.g/
