TIRANË, 5 qershor /ATSH- I. Vata/ – Prokurori pranë Gjykatës së Shkallës së Parë për Krimet e Rënda, Tiranë, Dritan Prençi doli sot në seancën dëgjimore në Komisionin e Pavarur të Kualifikimit, duke kaluar kështu në sitën e Vetingut.
Në bazë pikën 2 të nenit 4 të ligjit 84, të vitit 2016, seanca dëgjimore ndaj subjektit të rivlerësimit, Dritan Prençi zhvillohet mbi kriterin pasuror, atë të figurës si dhe vlerësimin profesional.
Seanca dëgjimore e Komisionit të Pavarur të Kualifikimit nisi në orën 11.30, ashtu siç edhe ishte lajmëruar nga KPK, e përbërë nga trupa gjykuese Genta Tafa (Bungo), Pamela Qirko, Suela Zhegu.
Kryetarja e trupës gjykuese Genta Tafa (Bungo) në fjalën e saj tha se kjo seancë zhvillohet në përputhje me nenin 55 te ligjit 84, 2016.
Në fillim të seancës dëgjimore për subjektin e rivlerësimit, prokurorin Prençi, kryetarja e trupës gjykuese Tafa paraqiti procedurën.
Trupa asistohet nga sekretarja gjyqësore Olsida Doçaj dhe në cilësinë e vëzhguesit ndërkombëtar ishte John Leonardo.
I ftuar në këtë seancë ishte edhe prokurori pranë Gjykatës së Shkallës së Parë për Krimet e Rënda Tiranë, Dritan Prençi i cili u prezantua konform procedurës.
Kryetarja e trupit gjykues i kujtoi subjektit të rivlerësimit të drejtën e trupës gjykuese dhe të vëzhguesit ndërkombëtar për të bërë pyetje, ndërsa vetë subjekti i rivlerësimit në përputhje me pikën tre të nenit 55 ka të drejtë të refuzojë të përgjigjet.
Prokurori Prençi, i pyetur nga kryetarja e trupës gjykuese, konfirmoi se ka marre materialet në ngarkim të tij.
Ne fund, kryetarja e trupës gjykuese Tafa tha se “për subjektin e rivlerësimit Prençi, kjo trupë gjykuese ka vendosur të vazhdojë procesin në bazë të tre kritereve të parashikuara nga ligji si kriteri pasuror, ai i figurës si dhe vlerësimin profesional”. /j.p/
