TIRANË, 7 Maj/ATSH/ – Marrëveshja me Greqinë ka rëndësi të jetë e drejtë dhe e zbatueshme për të dyja palët.
Ministri për Europën dhe Punët e Jashtme, Ditmir Bushati i pyetur sot për datat dhe afatet e negociatave me Greqinë theksoi se, “datat dhe afatet janë në thelb motivuese, e njëjta logjikë është e vlefshme dhe në raport me bisedimet që do të zhvillojmë me Greqinë, por nga ana tjetër me rastin në fjalë datat dhe afatet indikative nuk janë qëllim në vetvete”.
“Është e rëndësishme”, theksoi Bushati, “të kemi një proces të shëndetshëm dhe të shkojmë mundësisht drejt një marrëveshje të re e cila duhet të jetë marrëveshje më e drejtë dhe në fund të ditës e zbatueshme për të dyja palët dhe duhet të jetë një marrëveshje e cila duhet të hapë një kapitull të ri në marrëdhëniet ndërmjet Shqipërisë e Greqisë”.
“Sa i takon aktivitetit që do të organizojë pala greke në mbështetje të kandidaturës së Shqipërisë për të nisur bisedimet për anëtarësim e vlerësojmë këtë gjest mbështetjeje dhe bujar. Greqia është vendi që ka kontribuar për procesin e integrimit”, tha Bushati.
Raundi i parë i bisedimeve mes Shqipërisë dhe Greqisë për kufizimin e zonave detare, u zhvillua më 30 prill në Tiranë. Takimi u zhvillua në një klimë konstruktive dhe bashkëpunuese, thuhej në njoftimin e MEPJ. Ndërsa shumë shpejt pritet një raund u dytë takimi në Athinë.
/gj.mima/ /a.g/
