TIRANË, 26 prill /ATSH/ Partia Demokratike ka publikuar në faqen e saj draftstatutin e miratuar me votë unanime në Këshillin Kombëtar.
PD njofton se ky draftstatut do të diskutohet dhe do të propozohet për t’u miratuar në mbledhjen e së dielës të Kuvendit Kombëtar.
Risitë kryesore të draftstatutit të PD bazohen në 3 shtylla kryesore që garantojnë zgjerimin e demokracisë së brendshme dhe përfshirjen e anëtarësisë në vendimmarrje.
PD thekson se draftstatuti siguron garë të ndershme dhe të barabartë në të gjitha nivelet, duke nisur nga kryetari i partisë. Transferon pushtetin në organet kolegjiale, duke forcuar Kryesinë, Këshillin Kombëtar dhe Kuvendin Kombëtar. Vendos sistemin e kontrollit dhe balancës mes pushteteve. Kryetari zgjidhet me 1 anëtar, 1 votë nga anëtarësia, por shkarkohet me propozimin e gjysmës së Këshillit Kombëtar dhe me miratimin e Kuvendit Kombëtar.
Parimi “1 anëtar, 1 votë” zbatohet për konsultimin e anëtarësisë në përzgjedhjen e kandidatëve për deputetë. Komisioni i Vlerësimit të Kandidatëve garanton sipas rregullave të reja statutore që procesi i përzgjedhjes së kandidaturave të jetë demokratik dhe transparent:
I hapur për propozime. I bazuar në kritere të shpallura. I bazuar në konsultimin e anëtarësisë. I bazuar në respektimin e kritereve të karrierës në parti. I votuar në Këshillin Kombëtar.
Statuti i ri zgjeron kompetencat e Këshillit Kombëtar. 15% e anëtarëve të Këshillit mund të propozojnë kandidatura alternative nga ato që propozon Kryetari dhe Kryesia. Miraton marrëveshjet politike para dhe paszgjedhore. Zgjedh anëtarët e Komisionit të Integritetit dhe Etikës. Zgjedh anëtarët e Komisionit Zgjedhor. Zgjedh Komisionin e Vlerësimit të Kandidatëve.
Garantimi i karrierës është një koncept i ri në draftstatut dhe vlerësimi bazohet në kritere të qarta, që do të zbatohen për çdo funksionar dhe të zgjedhur në PD, si kohëzgjatja e anëtarësimit. Kontributi në fushata elektorale. Aktivizimi në jetën politike dhe publike të vendit. Standardet e larta etike të pastërtisë së figurës.
/gj.m//r.e/
