Tjetërsimi i pronave në bregdet: Arrestohet kryebashkiaku i Lezhës dhe 12 zyrtarë

TIRANË, 16 Mars/ATSH/ – Abuzimet me tokat në bregdet çuan sot në pranga Kryetarin e Bashkisë së Lezhës, Fran Frrokaj dhe 12 zyrtarë dhe shtetas të tjerë, ndërsa 11 shtetas  janë shpallur në kërkim.

Mesditën e sotme policia ka shoqëruar për në komisariat kryebashkiakun e Lezhës, i zgjedhur në 2015 si përfaqësues i Partisë Demokratike.

Përveç kryebashkiakut të Lezhës është arrestuar edhe nënkryetari i këtij institucioni të pushtetit vendor ndërsa janë marrë masa edhe për 22 bashkëpunëtorë të tjerë.

Arrestimet e policisë vijnë pas hetimeve disamujore të nisura nga Prokuroria në lidhje me abuzimet me tokat në bregdet.

Në një konferencë për shtyp, Policia e Lezhës konfirmoi arrestimin e zyrtarëve të lartë dhe informoi mbi shkeljet që janë ndeshur lidhur me tokat në bregdet.

Sipas Policisë “të akuzuarit kanë dërguar për regjistrim në Zyrën e Regjistrimit të Pasurive të Paluajtshme Lezhë sipërfaqe toke pyll, ranishte, shkurre dhe shkëmb, të cilat janë tjetërsuar si tokë bujqësore”.

“Sipas dispozitave ligjore të ligjit 7501 nga ana e tyre nuk duhej të procedohej me regjistrimin e këtyre pasurive, ndërkohë që më pas përfituesit e paligjshëm e kanë tjetërsuar pronën në kundërshtim me ligjin”, thuhet në njoftimin e policisë.

Shefi i Hetimit të Krimit Ekonomik në Drejtorinë e Përgjithshme të Policisë, Lutfi Minxhozi, konfirmoi se “hetimet po vazhdojnë dhe ky proces nuk ka lidhje me politikën”.

I pyetur mbi rolin e Kryetarit të Bashkisë Lezhë, Fran Frrokaj në këtë aferë, Minxhozi tha se “ai është një nga përgjegjësit kryesorë për planizimin e territorit në qark dhe ka përshpejtuar procesin e tjetërsimit të këtyre pronave”.

“Nga ZRPP-së Lezhë është kërkuar vazhdimisht konfirmimi nga Kryetari i Bashkisë Lezhë, Fran Frrokaj, nëse prona ishte apo jo tokë arë, dhe në vijimësi është marrë ky konfirmim nga Frrokaj”, tha Minxhozi.

Policia e Shtetit fton qytetarët të denoncojnë çdo rast abuzimi duke u garantuar hetimin e plotë dhe në vijimësi të çdo denoncimi.

Kronologjia e hetimeve sipas policisë së Lezhës

Konferenca e Drejtorit Vendor te Policisë Lezhe Ferdinand Mara dhe Drejtorit te Hetimit te Krimeve Ekonomike Financiare ne DPPSh, per operacionin ne Lezhe:

Drejtoria Vendore e Policisë Lezhë në bashkëpunim me Drejtorinë për Hetimin e Krimit Ekonomik e Financiar, Sektorin për Hetimin e Korrupsionit në Departamentin për Hetimin e Krimit te Organizuar dhe Krimet e Renda, Drejtorinë e Forcës Operacionale në Drejtorinë e Përgjithshme të Policisë së Shtetit, nën drejtimin dhe në bashkëpunim me Prokurorinë e Rrethit Gjyqësor Lezhë po vijojnë operacionin policor “Ranishtja 4“.

Deri tani janë arrestuar dhe ndaluar 12 zyrtarë publikë dhe janë shpallur  në kërkim 11 zyrtarë e shtetas të tjerë, të cilët në bashkëpunim me njëri-tjetrin duke abuzuar me detyrën kanë falsifikuar, tjetërsuar dhe përvetësuar 234,548 m2 tokë shtetërore ranishte  në zonën bregdetare Shëngjin, tek vendi i quajtur “Rana e Hedhun”.

Kjo sipërfaqe është shndërruar me dokumente të falsifikuara nga tokë shtetërore në bregdet, në tokë arë dhe pemëtore.  Më pas është regjistruar në Zyrën e Regjistrimit të Pasurisë së Paluajtshme Lezhë (ZRPP), duke përfituar padrejtësisht në interes të tyre dhe personave të tjerë.

Këto hetime proaktive janë kryer në funksion të procedimit Penal regjistruar në vitin 2017, për veprat penale tё “Shpërdorimit të detyrës”dhe “Falsifikimi i dokumenteve”.

Mbi bazën e provave të grumbulluara dhe sekuestruara nga Sektori për Hetimin e Korrupsionit dhe Prokuroria e Rrethit Gjyqësor Lezhë, Gjykata e Shkallës së Parë Lezhë, me vendimin e datës 15 mars 2018, ka vendosur masën e sigurisë personale  “Arrest ne burg” për zyrtaret e administratës shtetërore dhe për shtetas të tjerë të cilat janë ekzekutuar për shtetasit:

1. Fran FRROKAJ, 52 vjeç, lindur dhe banues në Lezhë, me detyrë Kryetar i  Bashkisë Lezhe.

2. Enver Hafizi, 62 vjeç, lindur dhe banues në Lezhë, me detyrë Nënkryetar i Bashkisë Lezhë

3. Gjok  Ndoka,  52 vjeç, lindur dhe banues në Lezhë, me detyrë Kryetar Këshillit të Qarkut Lezhë

4. Adenis Haxhia, 29 vjeç, lindur dhe banues në Lezhë, me detyre jurist pranë Bashkisë Lezhë.

5. Dilaver Neli, 56 vjeç, lindur dhe banues në Lezhë, me detyrë specialist në Drejtorinë e Mbrojtjes  së Tokës të Këshilli Qarkut Lezhë,

6. Enkelejd Zefi, 28 vjeç, lindur dhe banues në Lezhë, me detyrë specialist hartograf pranë ZVRPP Lezhë.

7. Pjeter Gjoni, 68 vjeç, lindur dhe banues në  Lezhë, përfitues tokë në mënyrë  të  paligjshme.

Me masën e sigurisë personale “Arrest në shtëpi” për zyrtaret:

1. Gjelina Baca, 58 vjeçe, me banim në Lezhë, me detyrë Drejtoreshë e Drejtorisë së Bujqësisë në Bashkinë Lezhë.

2. Juxhina Mema, 25 vjeçe, lindur dhe banues në Gramsh, me detyrë ish- specialiste në Drejtorinë e Bujqësisë në Bashkinë Lezhë

3. Marte Gjergji, 50 vjeçe, me banim në Lezhë, me detyrë topografe pranë Bashkisë Lezhë.

4. Frrok Frroku, 75 vjeç, me banim në Bashkinë Mamurras, ka përfituar tokë në mënyrë të paligjshme.

5. Luigj Paloka, 76 vjeç, me banim në Shkodër, ka falsifikuar aktet.

Gjithashtu janë shpallur në kërkim dhe punohet për kapjen e 11 shtetasve, me detyra në ZVRPP, në ish-Komunën Shëngjin apo përfitues tokash në mënyrë të paligjshme.

Hetimet lidhur me këtë dosje kanë filluar mbi bazën e të dhënave të siguruara nga burime policore dhe ankime të qytetarëve.

Në to evidentohej tjetërsimi në kundërshtim me ligjin të disa pasurive shtetërore “ranishte dhe pyll”, përgjatë bregut të detit në zonën  e plazhit të  fshatit Mali i Rencit dhe Mali i Shëngjinit, tek zona e quajtur “Rana e Hedhun”, si dhe pjesën e malit në shpatin e tij, sipër zonës së quajtur “Rana e Hedhun”, në Njësinë Administrative Shëngjin, Bashkia Lezhë.

Nga veprimet hetimore ka rezultuar se përgjatë periudhës 2016-2017, Bashkia Lezhë ka dërguar për regjistrim në ZVRPP-në Lezhë dokumentacionin për pajisjen me tokë të shtetasve Frrok Frroku, Gj. F., N. F., M. F.,  Z, Gj,, N. T.,  Pjetër Lini (Gjoni), V. Gj. dhe R.M.

Praktikat dokumentare të dërguara nga Bashkia Lezhë në Zyrën Vendore të Regjistrimit të Pasurive të Paluajtshme Lezhë, përmbajnë aktin e marrjes së tokës në pronësi, vërtetimet e kufizimeve, konfirmimet e pasurisë, planet e rilevimit, të cilat janë të falsifikuara dhe janë përpiluar në emër të personave, të cilët nuk kanë qenë dhe nuk janë banorë të Fshatit Mali i Rencit.

Nga ana e Bashkisë Lezhë dhe e Këshillit të Qarkut Lezhë, nëpërmjet shkresave përkatëse zyrtare pavarësisht se në realitet janë mal dhe ranishte janë konfirmuar  si toka të   kategorisë “Arë” dhe “Pemtore”.

Drejtuesit e Bashkisë Lezhë, duke i paraqitur si tokë bujqësore, kanë dërguar edhe një vendim të falsifikuar në emër të Këshillit të Qarkut Lezhë, si dhe personat e sipërcituar përvetësues të këtyre pronave, janë trajtuar me parë me tokë sipas ligjit 7051 dhe disa nuk janë banorë të zonës.

Zyra Vendore e Regjistrimit të Pasurisë se Paluajtshme Lezhë, pasi ka administruar dokumentacionin, gjatë analizimit të dokumentacionit të pajisjes me tokë të shtetasve të sipërcituar, ka konstatuar se sipërfaqet e pasurive nuk janë tokë bujqësore por janë tokë pyll dhe ranishte.

ZVRPP-ja ka kërkuar konfirmim për dokumentacionin e dërguar nga Bashkia Lezhë, me shkresa përkatëse nga Bashkia dhe Këshilli i Qarkut Lezhë.

Bashkia dhe Këshilli i Qarkut Lezhë, i kanë kthyer përgjigje zyrtare ZVRPP-së Lezhë, ku rikonfirmohet  zyrtarisht se pasuritë janë të llojit arë dhe pemëtore.

Pas marrjes së përgjigjeve nga ana e Bashkisë dhe Këshillit të Qarkut Lezhë, punonjësit e ZVRPP-së Lezhë, kanë proceduar me regjistrimin e këtyre pasurive, ku sipas dispozitave ligjore të Ligjit 7501, datë 19.07.1991 “Për tokën”, si dhe akteve ligjore e nënligjore të dala në zbatim të tij, nga ana e tyre nuk duhej të procedohej me regjistrimin e këtyre pasurive.

Pas regjistrimit të këtyre pasurive në Zyrën Vendore të Pasurive të Paluajtshme Lezhe, në një kohë shumë të shkurtër, përfituesit e paligjshëm, e kanë tjetërsuar pronësinë, duke e shitur me çmime simbolike në emër të personave të tjerë apo edhe të lidhjeve të tyre familjare, sipas kontratave te bllokuara.

Personat përgjegjës për përpilimin e këtyre praktikave të regjistrimit të pasurive në emër të shtetasve të sipërcituar janë specialisti i zyrës së kadastrës, shefja e kadastrës Kryetari i Bashkisë Lezhë Fran Frrokaj, pasi këta shtetas në bashkëpunim me njëri-tjetrin, në kundërshtim të plotë me kërkesat e ligjit 7501, si dhe akteve ligjore e nënligjore të dala në zbatim të tij kanë administruar, konfirmuar dhe dërguar për regjistrim dokumentacion të falsifikuar në përmbajtje dhe formë, për pasuri që janë në fakt toke pyll, ranishte, shkurre, shkëmb, dhe jo tokë bujqësore.

Nga ana e Këshillit të Qarkut Lezhë janë konfirmuar me shkresë se pasuritë e sipërcituara janë të llojit pemëtore, ndërkohë që në fakt sipas akt ekspertimi topografik është tokë pyll, ranishte, shkurre dhe shkëmb. Për këto veprime mbajnë përgjegjësi, specialisti i Arshivës dhe Kryetari i Këshillit te Qarkut Lezhe, Gjok Ndoka.

Nga ana e ZVRPP-së Lezhë, regjistruesi, juristi, hartografi, kanë pranuar administruar dhe regjistruar dokumentacionin e pasurive në emër të shtetasve të sipërcituar në kundërshtim me Ligjin 7501.

Toka e përfituar është shitur me dokumentacion të falsifikuar duke përfituar padrejtësisht shuma monetare të konsiderueshme. Vazhdon puna për identifikimin zyrtarëve e personave të tjerë të implikuar në këtë aktivitet kriminal.

Policia e Shtetit, duke përfituar nga rasti fton qytetarët të denoncojnë çdo rast abuzimi duke u garantuar reagim të shpejtë dhe të ashpër me Forcën e Ligjit.

/m.m//e.caushi/

 

 

Në bazë të nenit 4 të ligjit ”Për funksionimin e Agjencisë Telegrafike Shqiptare”, ndalohet kopjimi, riprodhimi dhe publikimi i informacionit pa cituar burimin e tij.