PEKIN, 29 gusht /ATSH-AA/ – Në kërkimet shkencore të bëra mbi efektin e ndotjes së ajrit në aftësitë verbale dhe numerike të trurit, shkencëtarët kinezë kanë arritur në përfundimin se ajri i ndotur redukton inteligjencën, sipas shtypit vendas.
Sipas gazetës “South China Morning Post”, shkencëtarët kinezë nxorën në pah se ndotja e ajrit, për të cilën edhe më parë dihej se dëmton mushkëritë dhe shkakton shkurtimin e jetës, redukton aftësitë verbale dhe numerike të trurit.
Shkencëtarët në testet që kanë bërë në 86 qytete në mbarë vendin tek mbi 32 mijë burra e gra të moshës mbi 25 vjeç, kërkuan nga të testuarit që t’u përgjigjeshin 24 pyetjeve të matematikës standarde dhe 34 pyetje mbi njohjen e fjalëve.
Më tej shkencëtarët të cilët kanë ekzaminuar përqindjet e saktësisë së përgjigjeve që kanë dhënë të testuarit sipas dendësisë e ndotjes së ajrit nga qytetet ku jetojnë dhe zbuluan se me rritjen e dendësisë së ajrit të ndotur zvogëloheshin përgjigjet e sakta në testet.
Studimi u publikua në revistë amerikane ”Proceedings of the National Academy of Sciences”.
Shumica e metropoleve në Kinë janë të ndotura si pasojë e zhvillimit dhe industrializimit të shpejtë./ /os/ a.jor.
