TIRANË, 22 dhjetor/ATSH/Në qytetin verior të Pukës vijon puna për mbjelljet e reja të drurëve dekorativë.
Kryetari i bashkisë së Pukës, Gjon Gjonaj bëri të ditur se gjatë ditëve në vijim disa parcela pyjore do të mbillen me drurë të llojit pishë duke shënuar kështu fillimin e shtimit të sipërfaqeve pyjore pas 30 viteve shkatërrim.
Sipas tij, vetëm gjatë 5 viteve të fundit bashkia e Pukës ka mbjellë mbi 1500 drurë dekorative dhe më shumë se 10.000 shkurre.
“Bashkia e Pukës me fondet e saj do të përpiqemi që rreth 20-30 mijë fidanë të llojeve të ndryshme do të futen në sistemin e pasurimit të kësaj sipërfaqe të gjelbër”, theksoi Gjonaj.
Ai shtoi se “Puka do të mbajë tre emra, Puka turistike, e gjelbër dhe e pastër. Për të realizuar këto premtime po bëjmë disa projekte, për të cilat po punojmë vazhdimisht”.
Nisma për mbjelljen e drurëve dekorativë po pasurohet nga viti në vit, duke u shtrirë tashmë edhe në masivet pyjore.
/k.s//a.a/
