TIRANË, 1 nëntor/ATSH/ Bashkia e Lezhës vazhdon mbështetjen për zhvillimin e artit dhe kulturës, veçanërisht duke nxitur brezin e ri të artistëve lezhjanë.
Zv.kryetarja e bashkisë Lezhë, Eueda Molla, në bashkëpunim me shoqatën kulturore “Teuta” të grave shqiptare në Trentino, Itali, me kryetare Leonora Zefi, shpërndanë sot disa instrumente muzikore në shkollën e muzikës “Besëlidhja”.
Duke e konsideruar mbështetjen për artin një prioritet, bashkia e Lezhës ka mbështetur në vijimësi nismat dhe aktivitetet kulturore, duke i dhënë prioritet brezit të ri të artistëve.
Të shumta kanë qenë aktivitetet kulturore të organizuara nga bashkia e Lezhës, ku nxënësit e shkollës “Besëlidhja” janë bërë pjesë e aktivitetit artistik.
Instrumentet e reja muzikore të dhuruara ditën e sotme janë një stimul i ri në drejtim të pajisjes së kësaj shkolle me të gjitha mjetet e nevojshme për kryerjen e misionit të saj në drejtim të formimit të brezit të ri të artistëve.
/m.m/j.p/r.e/
