Facebook pezullon versionin për fëmijë të Instagram

NJU JORK, 27 shtator /ATSH-AFP/ – Facebook njoftoi sot se ka pezulluar punën e tij për një version të Instagram për fëmijët nën 13 vjeç, në përgjigje të kritikave në emër të shëndetit mendor të fëmijëve.

“Grupi dëshiron të marrë më shumë kohë për të punuar me prindërit, ekspertët dhe hartuesit e politikave, për të treguar vlerën dhe domosdoshmërinë e këtij shërbimi”, tha menaxheri i Instagram, Adam Mosseri, në një postim në blogun e rrjetit social.

Kompania ende thotë se beson në vlerën e dizajnimit të një versioni për të rinjtë, duke argumentuar se “fëmijët po bëhen gjithnjë e më të rinj, duke gënjyer për moshën e tyre dhe duke shkarkuar aplikacione që synojnë moshat 13 vjeç e lart”.

Prokurorët e përgjithshëm të 44 shteteve i kishin dërguar një letër në maj themeluesit të grupit kalifornian, duke iu referuar kërkimeve që tregojnë një lidhje midis përdorimit të rrjeteve sociale dhe “rritjes së shqetësimit psikologjik dhe sjelljes vetëvrasëse midis të rinjve”.

Ata përmendën, ndër të tjera, dëmin e shkaktuar nga krahasimi i vazhdueshëm me bashkëmoshatarët, siç janë çrregullimet e të ngrënit (anoreksi, bulimia), si edhe rreziqet e ngacmimit në internet nga adoleshentët e tjerë ose nga kriminelët e rritur.

Një fushatë kolektive kundër shënjestrimit të fëmijëve i kishte dërguar një letër Mark Zuckerberg me të njëjtin efekt, disa javë më parë.

“Pezullimi i zbatimit të “Instagram Kids” nuk do të thotë që grupi pranon se projekti është një ide e keqe”, siguron Facebook.

Ndërsa pret të rifillojë zhvillimin e versionit për më të rinjtë, rrjeti social thotë se dëshiron të vazhdojë instalimin e mjeteve të reja për të “lejuar prindërit të mbikëqyrin llogaritë e fëmijëve të tyre” në Instagram, teorikisht të rezervuara për mbi 13 vjet.

Grupi planifikon të bëjë njoftime në muajt e ardhshëm./ /ervo/