TIRANË, 16 gusht/ATSH/ Pemët dekorative në qytetin e Elbasanit prej disa ditësh janë prekur nga një insekt dëmtues i cili është shtuar në masë.
Insekti, jo vetëm dëmton pemët duke shkaktuar deri edhe tharjen e tyre, por mund të shkaktojë shqetësime edhe tek njerëzit, sidomos fëmijët mund të preken nga alergjia e shkaktuar prej tij.
Bashkia e Elbasanit ka marrë masa të menjëhershme duke bërë dezinfektimin e të gjitha pemëve të prekura dhe të zonave rreth tyre për të parandaluar përhapjen e mëtejshme të mikrobit dhe zhdukjen e tij.
Më i prekur rezulton të jetë rrapi i bardhë, i cili është dëmtuar më shumë, dhe pikërisht aty ka nisur puna fillimisht, punë e cila do të vijojë në të gjithë qytetin.
Bashkia siguron se brenda 3-4 ditëve të gjitha pemët do jenë të dezinfektuara dhe qyteti do të jetë i pastër.
Edhe pse nuk dihet ende shkaku i kësaj situate, bashkia e Elbasanit u kërkon qytetarëve të qetësohen, pasi nuk ka rrezikshmëri dhe puna po vijon me intensitet deri në zhdukjen e tyre. /m.m/
