TIRANË, 4 gusht/ATSH/ Ministrja e Kulturës, Elva Margariti bën të ditur se vijon puna në kalanë e Durrësit, e cila në vitin 2019 pësoi dëmtime të konsiderueshme nga tërmeti.
Margariti shprehet se “me gjithë temperaturat e nxehta vijon puna konservuese dhe përforcuese në Kullën C në Kalanë e Durrësit, e dëmtuar nga tërmeti i nëntorit 2019. Një projekt që nisi me mbështetjen financiare të Fondit të Ambasadorit për Ruajtjen e Trashëgimisë Kulturore, Agjencisë Suedeze për Bashkëpunim Ndërkombëtar, mbështetjes shkencore të Fondit Botëror të Monumenteve dhe Ministrisë të Kulturës”.
Ministrja thekson se procesi i punës që po ndiqet me përkushtim në këtë monument të rëndësishëm.
“Zbatuesit e këtij projekti, CHwB Albania kanë realizuar tashmë stabilizimin emergjent, me qëllim parandalimin e dëmtimeve të mëtejshme në monument. E po ashtu një seri analizash, për të përcaktuar ndërhyrjet konservuese, që kanë nisur me konsolidimin dhe riparimin e murit të themeleve me teknika tradicionale”, thekson ministrja.
/r.e/
