BERLIN, 12 gusht /ATSH-DPA/ – Gjermania shënoi rritjen e saj më të madhe ditore me rastet e COVID-19 që nga fillimi i majit.
Instituti ”Robert Koch” (RKI) si dhe agjencia qeveritare e kontrollit të sëmundjeve, ka raportuar 1 226 infeksione të reja koronavirus duke e çuar në 218 519 totalin e konfirmuar deri më tani në vend.
Kulmi i shpërthimit u arrit në fillim të prillit, kur RKI raportoi mbi 6 000 raste të reja brenda një dite.
Një total prej 9 207 njerëz kanë vdekur pasi kontraktuan virusin në Gjermani.
“Kjo është shqetësuese, pa dyshim. Këtu shohim se, si rezultat i kthimit të udhëtarëve, si dhe festave të të gjitha llojeve … kemi shpërthime më të mëdha në pothuajse çdo rajon të vendit”, theksoi ministri gjerman i Shëndetësisë, Spahn në radion ”Deutschlandfunk”./ /os/
