TIRANË, 13 maj/ATSH/ Situata epidemiologjike në vend paraqitet e qëndrueshme mbështetur në identifikimin e rasteve të deritanishme dhe gjurmimin aktiviologjik në mënyrë aktive.
Ministria e Shëndetësisë dhe Mbrojtjes Sociale bën të ditur se aktualisht janë 21 pacientë të shtruar në spitale mes të cilëve, 1 rast në terapi intensive.
Nga fillimi i epidemisë, deri tani, në vendin tonë janë kryer 11 578 testime, nga të cilat, 11 048 janë testime molekulare dhe 530 janë testime serologjike.
Pavarësisht situatës së përmirësuar, Ministria e Shëndetësisë dhe Mbrojtjes Sociale thekson se është shumë e rëndësishme që qytetarët të ruajnë distancimin fizik dhe higjienën personale; bizneset të zbatojnë protokollet e sigurisë për të ruajtur shëndetin e qytetarëve.
Qytetarët duhet të jenë të kujdesshëm të mos neglizhojnë shenjat e sëmundjes COVID-19, ndaj ju lutemi telefoni në numrin unik të Urgjencës Kombëtare, 127.
Për informacion në lidhje me COVID-19, për këshillim psikologjik në rast të shfaqjes së shenjave të ankthit apo shqetësime të tjera, Ministria apelon qytetarët të telefonojnë në linjën e gjelbër 0800 40-40. /a.gjonaj/j.p/r.e/
