TIRANË, 12 qershor/ATSH/ – Kushtet për hapjen e negociatave të Shqipërisë me Bashkimin Europian janë plotësuar tashmë.
Kështu është shprehur Raportuesi për Shqipërinë në Parlamentin Europian, Knut Fleckenstein.
Gjatë fjalës së tij në Parlamentin Europian, eurodeputeti Knut Fleckenstein, i ka bërë thirrje shteteve anëtare që të hapin negociatat me Tiranën zyrtare, duke theksuar përpara tyre se Shqipëria ka shënuar progres përsa i përket sundimit të ligjit dhe vendi po ecën në drejtimin e duhur, raportojnë mediet.
Apeli ndaj vendeve të unionit vjen pak ditë para vendimit të rëndësishëm që BE do të marrë nëse do të hapë apo jo negociatat e anëtarësimit të Shqipërisë.
“Në Shqipëri ka patur progres të qartë dhe çështjet sa i takon sundimit të ligjit po shkojnë në drejtimin e duhur dhe ndoshta edhe më mirë se në disa vende brenda Bashkimit Europian. Prandaj, ne duhet të hapim bisedimet e anëtarësimit me këtë vend”, – apeloi ai në Parlamentin Europian.
Përsa i përket liberalizimit të vizave për Kosovën, Fleckenstein theksoi se “… të mos harrojmë që kriteret për liberalizimin e vizave janë plotësuar tashmë”.
Eurodeputeti gjerman kërkoi gjithashtu hapjen e negociatave me Maqedoninë dhe avancimin e tyre në kapitujt e tjerë për rastin e Serbisë apo edhe Malit të Zi duke nënvizuar se “… duhet të dërgojmë në Ballkanin Perëndimor një sinjal të qartë se cila është qasja jonë për këtë rajon”. /e.caushi/
