PRISHTINË, 30 tetor/ATSH/ Komisionari për Migracion i Komisionit Europian Dimitris Avramopoulos nënshkroi një marrëveshje me ministrin në detyrë të Punëve të Brendshme të Kosovës, Ekrem Mustafa, për zbatimin e Planit të Përbashkët të Veprimit për Antiterrorizmin për Ballkanin Perëndimor.
Marrëveshja identifikon veprime prioritare konkrete, të cilat autoritetet kosovare duhet të ndërmarrin gjatë viteve 2019 dhe 2020, dhe mbulon pesë objektivat e Planit të Veprimit të Përbashkët të miratuar nga BE dhe partnerët e saj të Ballkanit Perëndimor në tetor 2018.
Aksionet prioritare të nënshkruara sot përfshijnë:
Përqendrimi në adresimin e sfidave të paraqitura nga kthimi i luftëtarëve që kanë marrë pjesë në vendet e tjera dhe anëtarëve të familjeve të tyre. Kjo përfshin hetimin sistematik dhe ndjekjen penale të veprave kriminale të bëra nga ata, programe të rehabilitimit dhe riintegrimit brenda dhe jashtë burgjeve, shkëmbimi i informacionit në dispozicion për luftëtarët që kanë marrë pjesë në vende të huaja që kthehen në Kosovë me shtetet anëtare të BE-së.
Mbështetja e masave strukturore, të tilla si një koordinator për kundërterrorizmin dhe kundër ekstremizmit të dhunshëm, një strukturë e përmirësuar në analizën e vlerësimit të kërcënimit të Kosovës dhe vendosja e një mekanizmi koordinimi për projektet e reja lokale për parandalimin e ekstremizmit të dhunshëm.
Përqendrimi në pastrimin e parave dhe luftimi i financimit të terrorizmit, duke përfshirë korrigjimin e mangësive në kornizën aktuale rregullatore, një vlerësim gjithëpërfshirës të rrezikut për pastrimin e parave dhe financimin e terrorizmit, si dhe masa për të inkurajuar hetimin dhe ndjekjen penale të aspekteve të financimit të çështjeve të terrorizmit.
Autoritetet e Kosovës synojnë t’i raportojnë çdo dy vjet KE-së për gjendjen e zbatimit, përfshirë çdo vështirësi me të cilën mund të përballen. Marrëveshja përmban gjithashtu edhe mbështetjen e parashikuar të KE-së në këtë drejtim, thuhet në komunikatën për media të shpërndarë nga Komisioni Europian. /KosovaPress/
