Tiranë, 21 Tetor/ATSH/- Në periudhën janar-shtator të këtij viti janë shënuar 1136 aksidente rrugore nga 1303 aksidente të ndodhura në nëntëmujorin e 2018-ës, duke shënuar një ulje prej 12,8%, krahasuar me të njëjtën periudhë të një viti më parë.
Sipas raportit të publikuar nga Instituti i Statistikave (INSTAT), për këtë periudhë, aksidentet rrugore në 14,2% të rasteve, kanë ndodhur si pasojë e sjelljes së këmbësorit.
Numri i të aksidentuarve në nëntëmujorin e vitit 2019, sipas INSTAT, rezulton 1570 persona nga 1765 persona, duke u ulur me 11%, krahasuar me të njëjtën periudhë të vitit 2018.
Gjatë kësaj periudhe, numri i aksidenteve sipas sjelljes së këmbësorit është ulur 38,3%, krahasuar me një vit më parë.
Referuar shifrave për muajin shtator numërohen 122 aksidente rrugore nga 156 aksidente të ndodhura në shtatorin e vitit 2018, duke shënuar ulje me 21,8%. /a.gjonaj/ /a.g/
