Tiranë, 8 Mars/ATSH/ – Ministrja e Shëndetësisë dhe Mbrojtjes Sociale do të vijojë të rrisë pagat për mjekët dhe infermierët edhe këtë vit. Kjo deklaratë u bë nga vetë ministrja e Shëndetësisë, Ogerta Manastirliu në një aktivitet të zhvilluar në nder të ditës ndërkombëtare të gruas, duke bërë bashkë në ambientet e ministrisë mjekë dhe infermierë. “Zemra ma donte të ishim të gjitha bashkë sot, të 12 mijë e 47 punonjësit gra të sistemit tonë shëndetësor për t’u përulur përballë punës tuaj.Ju meritoni më të mirën dhe me shumë përulësi ju them se mbështetja ime personale por mbi të gjitha e qeverisë shqiptare nuk do të mungojë.Ne do të vijojmë të përmirësojmë kushtet e punës në qendrat tona shëndetësore, në spitalet tona, që ju ta kryeni më mirë profesionin tuaj.Do të vijojmë me politikën e rritjes së pagave edhe në vitin 2018 për personelin mjekë dhe infermierë. Angazhimi ynë është i përditshëm në këtë drejtim dhe për një arsye tjetër, sepse ju jeni shembuj frymëzimi jo vetëm sepse keni lartësuar pozitat e grave në shoqërinë shqiptare por sepse ja dilni që çdo ditë të shpëtoni jetë dhe ky është më i larti i misioneve”, tha Manastirliu.Ajo u shpreh gjithashtu se që nga vitit 2019 do të plotësohen nevojat me mjekë specialistë në shumë spitale të vendit. Sakaq, Ministrja Manastirliu dhe zv/Ministret e Shëndetësisë dhe Mbrojtjes Sociale ndanë disa çmime mirënjohjeje për mjeket dhe infermieret e vitit, të cilat i janë dedikuar këtij profesioni me përkushtim e sakrifica. U nderua me çmimin e mirënjohjes Liridona Cani, infermiere në qendrën shëndetësore Ostren në Bulqizë; dr. Zana Hoxha, mjeke gastrohepatologe në spitalin e Shkodrës, dr. Gjyzede Zalla, pediatre në spitalin e Durrësit, Sadete Gjeçi, infermiere e urgjencës në spitalin universitar të Traumës dhe prof. Eli Foto, shefe e shërbimit infektiv në QSUT.
