TIRANË, 10 maj /ATSH/- Ministri i Brendshëm, Sandër Lleshaj, e cilësoi një lajm tronditës për çdo shqiptar ndarjen nga jeta të major Klodian Tanushit.
Lleshaj i shpreh ngushëllimet familjes së major Tanushit.
“Humbja e major Klodian Tanushit është një tjetër lajm tronditës për çdo shqiptar. Ngushëllime familjes dhe Forcave të Armatosura. U prehtë në paqe!”, shprehet Lleshaj.
Komandanti i kontingjentit shqiptar në misionin e NATO “Enhanced Forward Presence”, major Klodian Tanushi humbi betejën me jetën, ndërsa ndodhej në spitalin “Riga East University”, në gjendje shëndetësore të rënduar pas incidentit në bazën e NATO-s në Letoni.
Major Tanushi u plagos rëndë në incidentin ku humbi jetën nëntetarja Zarife Hasanaj si pasojë e shpërthimit të disa municioneve të paplasura gjatë kryerjes së detyrës në bazën e NATO-s në Letoni, ku po zhvillohej stërvitja ushtarake e një prej aleatëve. Nga ky shpërthim ka mbetur i plagosur edhe rreshteri Julian Xhevat Kapaj./k.s/j.p/
