TIRANË, 26 mars/ATSH/ Në Korçë po vijon puna për sistemimin dhe transformimin e parkut të qytetit, në një park model me standarde europiane.
Aktualisht ka nisur puna për rehabilitimin e 2000 m2 sipërfaqe në parkun “Rinia”, ku janë mbjellë 50 fidanë të rinj, ndërsa po ndërtohet edhe një korsi e dedikuar për biçikletat.
Parku “Rinia” në Korçë, me një shtrirje prej 100 mijë metrash katrorë, është i veçantë sa i përket shumëllojshmërisë së drurëve dhe bimësisë.
Ai është krijuar 60 vjet më parë për të qenë mushkëria e Korçës në veriperëndim të qytetit dhe frekuentohet nga dhjetëra qytetarë të moshave të ndryshme.
Në fundjavë ai është edhe më i populluar nga shëtitjet e familjarëve, turistëve dhe aktivitetet sportive të të rinjve.
/m.m/j.p/
