TIRANË, 27 nëntor /ATSH/ – “Rruga drejt BE-së kalon përmes bashkive vendore dhe këto bashki do ta sjellin Shqipërinë edhe më pranë BE-së”, tha ambasadori i BE-së Luigi Soreca gjatë një takimi të bashkisë me banorët e Patosit, së bashku me kryetaren e bashkisë Rajmonda Balilaj dhe zëvendësministren e Brendshme, Romina Kuko.
Ekipi i Delegacionit të BE-së shkoi dje në bashkinë e Patosit për të promovuar fuqizimin e grave dhe eliminimin e dhunës ndaj grave, si dhe për të dëgjuar komunitetin vendor rreth rolit të tij në procesin e integrimit europian të Shqipërisë.
Fuqizimi i grave dhe barazia gjinore janë të drejta të njeriut dhe prandaj luajnë një rol në procesin e integrimit, tha ambasadori Soreca duke theksuar gjithashtu rëndësinë e qeverisjes vendore dhe policimit në komunitet për të garantuar siguri për gratë dhe vajzat, ende viktima të dhunës me bazë gjinore.
61 kënde të BE-së në të gjitha njësitë vendore në mbarë Shqipërinë, të mbështetura nga projekti “Bashkitë për Europën” i financuar nga BE-ja, po punojnë për të përmirësuar të kuptuarit nga ana e qeverisë vendore të BE-së, politikave, institucioneve, programeve dhe fondeve të saj.
/gj.mima/ /a.g/
