TIRANË, 13 shtator/ATSH/ Deputetja e Partisë Demokratike, Jorida Tabaku bëri të ditur sot se qeveria i mbylli lojërat e fatit në vitin 2018 për t’i rikthyer duke i përqendruar në pak duar.
“Komisioni i Ekonomisë vite më parë pati debat të gjatë në lidhje me ligjin për lojërat e fatit, ligj për të cilin unë sot e kësaj dite jam në proces gjyqësor me Kryeministrin e vendit. Braçe atëherë, shumë aktiv në diskutimet e tij, tha që këto nuk do të riktheheshin më në asnjë formë dhe që do mbyllej përfundimisht epoka e marrëdhënies së shqiptarëve me lojërat e fatit. Përdorën terma nga “barkderrët e alkoolizuar” që hanë të ardhurat e familjeve shqiptare, deri tek termat që lidhen me të ardhurat ekonomike do i vinin shtesë buxhetit të shtetit. Pasi qeveria shqiptare e mbylli “marrëzinë e fundit”, akuza konkrete që ne diskutuam në Komision ishte që po mbyllen lojërat e fatit dhe po mbyllen të gjithë operatorët e vegjël, 4600, për t’i përqendruar këto në pak duar”, u shpreh Tabaku, gjatë diskutimit të pr/ligjit në Komisionin për Ekonominë dhe Financat.
Sipas saj, në 2013-ën ishin 800 kompani që ofronin lojëra fati, në 2015 ishin mbi 4300.
“Pra pati një shpërthim të kompanive që ofronin lojërat e fatit. Ndërkohë që sot ndodhemi në situatën ku ligji për lojërat e fatit është 1 nga 12 ligjet që ky Parlament akuzohet që e ka miratuar në mbështetje të interesave të grupeve të lojërave të fatit. Është një nga ligjet që thuhet që është kapje shteti, e cilëson Parlamentin dhe ata që kanë votuar këtë ligj si të kapur nga bizneset e lojërave të fatit. Përpara seancës, në 2016, në kërkesë të dy kolegëve socialist, ku njërin sot e kemi dhe ambasador, u bënë propozime në interes të kompanive të lojërave të fatit. Këto 2 kërkesa e ndryshuan thelbin e ligjit”, u shpreh Tabaku.
Sot, vuri në dukje ajo, qeveria shqiptare kthen ligjin, ku fjalia kyç është “rikthimi i kategorisë së basteve sportive”, që do të thotë pranohet dështimi me ligjin e lojërave të fatit dhe pranohet që në 6 vite kanë operuar bastet sportive. “Paska dhe një shoqatë bastesh sportive kur ndërkohë nuk lejoheshin. Si mund të ekzistojë një shoqatë për një aktivitet që nuk lejohet?”, vijoi Tabaku.
Deputetja e PD-së, Tabaku, theksoi se mbyllja nga ana e qeverisë çoi në përqendrimin te pak kompani të mëdha, që ju, iu drejtua ajo deputetëve të mazhorancës, i keni konsultuar për ligjin, çoi në informalitet të lartë në lojërat e fatit dhe në eliminimin e gjithë këtyre pikave dhe operatorëve të vegjël për të përqendruar në ato duar që mazhoranca ka konsultuar këtë ligj.
“Zv/ministrja tha që ky ligj ka pasur një konsultim të gjatë, por tek dokumenti i sjellë nga qeveria thuhet se kohëzgjatja e konsultimit publik ka qenë 20 ditë pune. Jeni ulur me grupet e interesit dhe këto kompani, por kjo nuk quhet konsultim. Është njësoj si bordi i naftës dhe bordi i ushqimeve. Jeni ulur me to dhe keni rënë dakord me çfarë duhet të bini dakord me to. Sot rikthimi i këtij ligji vendos një njollë tjetër për këtë parlament dhe rrezikun potencial të lojërave të fatit, që në pastrimin e parave është një nga tre sektorët potencial. Projektligji dhe të gjitha dokumentet që ju keni nisur nuk na sqaron asnjë rast sa kazino keni licencuar deri më sot, sa subjekte ka, sa janë subjektet që kanë resort-kazino. Ligji prek dhe lotarinë kombëtare dhe elementë tjerë të lojërave të fatit dhe as këto nuk janë të sqaruara këtu”, tha Tabaku.
Ajo vuri në dukje se është e pakonceptueshme që këto lojëra të jenë të reklamuara në mediet elektronike.
“Është hequr termi “media elektronike” nga ligji, që do të thotë që kushdo që ka një smartphone dhe internet, pavarësisht moshës, ndodhet përpara rrezikut potencial të basteve sportive online. Çështja sociale është çështja morale që qeveria juaj e nisi këtë ligj në 2013-ën. Jam e sigurt që sot, pas 10 vitesh nuk ka asnjë çështje morale që ju mund të mbani, të paktën me këtë ligj jo, por dhe me asnjë tjetër. Por të paktën kjo është arsyeja që erdhët dhe i thatë këtij Parlamenti që po i hiqni nga shkollat, nga cepat e rrugëve dhe po i’a vendosi sot para syve gjithë shqiptarëve, gjithë fëmijëve”, theksoi më tej.
Tabaku u ndal dhe në çështjen e taksimit.
“Ky projektligj ka dhe një hapësirë të madhe për sa i përket interpretimit të taksave, si do të jetë analiza që ju do të llogarisni fitimin? Lëvizni nga koncepti i tatimin mbi fitimin 15 %, kaloni te qarkullimi, te të ardhurat, duke e komplikuar skemën, prek legjislacionin që lidhet me bankat, sepse bankat që do të kenë lidhje me këtë aktivitet do të licencohen nga Banka e Shqipërisë tashmë. Prekni dhe legjislacionin që lidhet me Agjencinë e Mbikëqyrjes Financiare duke krijuar një komitet licencimi tashmë që zëvendësohet nga zv/kryeministrja. Janë 3 ligje që preken paralelisht dhe është rreziku potencial i pastrimit të parave, por ajo çfarë është më e rëndësishmja është dështimi i një beteje që qeveria i vuri ballin, që akuzoi dhe që sot po rikthehet pas”, deklaroi Tabaku.
Për mua, shtoi Tabaku, rreziku më i madh është që u mbyllën gjitha ato pika dhe e përqendruan në pak duar.
“Ky është kontrolli i tregut, ky është korrupsioni me ligj, që me këtë ligj përsëri e sillni këtu në Parlament. Shpresoj shumë që kolegët socialistë të kenë të njëjtën pikëpamje që kishin kur e diskutuam për herë të parë në 2015-ën dhe shpresoj që ky komision të këtë mundësinë të konsultohet me grupet e interesit reale, jo me këto që përfitojmë.
Këto që ju jeni konsultuar për 20 ditë, janë ata që përfitojnë, nuk është ky konsultimi publik. Janë konsultime të cilat duhet të realizohen me grupet vulnerabël, me ata që preken, me ata që kanë varësi nga lojërat e fatit, sepse këtë detyrim moral e morët kur sollët ligjin. Nuk e morët detyrimin për t’u dhënë licenca kazinove të mëdha dhe resorteve. E morët detyrimin për familjet, për të hequr bastet sportive”, u shpreh ajo.
Ajo ngriti shqetësim për konkurrencën në treg.
“Kemi një shqetësim që ne e kemi diskutuar në këtë komision për shumë sektorë, një përqendrim tregu te karburantet, te sigurimet, tek ushqimet dhe te çdo lloj sektori, ju sot keni vetëm një përqendrim në pak operatorë, në pak duar, që ka limituar konkurrencën dhe e ka prishur tregun në çdo sektor. Por shqetësimi për lojërat e fatit është social. Nuk ka asnjë analizë konkrete se sa është ndikimi që ka pasur mbyllja e lojërave të fatit atëherë dhe se si do të paguajnë këto kompani të ardhura, se sa është xhiroja e parashikuar”, nënvizoi Tabaku.
/r.e/
