LONDËR, 13 korrik /ATSH-DPA/ – Mjekët e rinj në Angli kanë nisur një grevë pesëditore në atë që përshkruhet si greva më e gjatë e këtij lloji në historinë e NHS-së, mes protestave të vazhdueshme për pagat në shërbimin shëndetësor.
Anëtarët e Shoqatës Mjekësore Britanike (BMA) në Angli organizuan protesta jashtë spitaleve nga ora 07:00, që do të shkaktojnë ndërprerje të mëdha duke ndikuar në operacionet dhe konsultimet.
Grevat po zhvillohen mes spekulimeve se qeveria do të pranojë rekomandimet nga organet e rishikimit të pagave që prekin punonjësit e sektorit publik, duke përfshirë mësuesit, nëpunësit civilë dhe punonjësit e NHS.
Drejtuesit e BMA i kanë kërkuar qeverisë të kthehet në tryezën e bisedimeve në një përpjekje për të zgjidhur mosmarrëveshjen e gjatë, e cila tashmë ka çuar në një sërë grevash dhe mijëra operacione dhe konsultime të anuluara./ /os/
