TIRANË, 6 mars /ATSH/ Ministri i Mbrojtjes, Niko Peleshi u shpreh sot se, të rinjtë kanë shprehur interes për të aplikuar për një nga 400 pozicionet e lira në Forcat e Armatosura.
Peleshi theksoi se, ka ftesë të hapur për të gjithë ata që duan të aplikojnë pranë Qendrës së Personel Rekrutimit apo në tendën e ngritur në qendër të Tiranës për të fituar një nga mundësitë më të mira për karrierën e tyre.
“Të jesh efektiv i FA është krenari, jo vetëm sepse përfaqëson forcën e kombit, por edhe sepse përfaqëson një vend anëtar të NATO-s”, nënvizoi më tej ministri Peleshi.
Për të filluar procesin e rekrutimit i interesuari duhet të plotësojë një sërë kriteresh dhe dokumentash.
Shtetasit që kërkojnë të aplikojnë për ushtarë/detarë aktivë në FA duhet të aplikojnë drejtpërdrejt në zyrën e pranimit në Qendrën e Personel Rekrutimit, e cila vijon procedurat e testimit dhe përzgjedhjes me kandidatët që janë gjykuar të aftë nga ana shëndetësore.
/r.e/
