TIRANË 7 korrik /ATSH-I.Vata/ Kryetari i PD-së Sali Berisha deklaroi sot se protestat do të ndalen vetëm atëherë kur realizojnë qëllimin, i pyetur pë protestën e sotme.
Në një prononcim për mediet jashtë sallës së Parlamentit, Berisha u bëri thirrje shqiptarëve të marrin pjesë në protestë.
Ai u shpreh se protesta është kundër shpopullimit të Shqipërisë, kundër manipulimeve të votës dhe sistemeve elektorale, kundër Ballkanit të Hapur.
“Duhet të shpreh mirënjohjen dhe ftesën time për qytetarët e Tiranës dhe mbarë Shqipërisë, të bashkohemi në orën 7 në Bulevardin Dëshmorët e Kombit, para ndërtesës së Këshillit të Ministrave, për të shprehur me protestën tonë vendimin e shqiptarëve për shpëtimin e Shqipërisë nga regjimi kleptokratik i Edi Ramës”, tha Berisha.
Berisha u shpreh se gjithnjë protesta ka skenarin e vet.
“E rëndësishme është që ne të japim mesazhin tonë të fuqishëm se shqiptarët nuk do ta tolerojnë më këtë regjim, i cili s’meriton të ekzistojë absolutisht as edhe një ditë të vetme. Kjo është protesta që inauguron procesin e largimit të Edi Ramës nga pushteti. Ç’ka do të thotë se protestat ndalen vetëm atëherë kur realizojnë qëllimin madhor”, tha Berisha. /j.p/
