TIRANË, 26 prill /ATSH/ Në Pogradec, blloku “Rinia” që ndodhet në qendër të qytetit, është shndërruar në një nga zonat model, me infrastrukturë rrugore sipas standardeve më të mira dhe mjedise të gjelbëruara anekënd.
Bashkia e Pogradecit ka përmbyllur investimin infrastrukturor në bllokun “Rinia”, projekt që përfshinte rehabilitimin e rrugëve, shesheve e fasadave të objekteve të banimit.
Investimi përfshiu rikonceptimin dhe shtrimin me asfalt të rrugës nga Kisha e re deri në qendër, bashkë me rrugën “Rinia”, ndërsa punimet u përqendruan në sistemimin dhe shtrimin e rrugëve të brendshme të lagjes, trotuaret, hapësirat e gjelbëruara, deri tek fasadat e pallateve.
Realizimi i investimit me vlerë 1.4 milionë euro, brenda afatit 16 muaj, përkon edhe me fillimin e sezonit turistik të këtij viti.
Lagja “Rinia” e restauruar plotësisht ofron jo vetëm një panoramë të bukur, por konsiderohet edhe si një vlerë e shtuar në lagjet model që po rivitalizohen çdo herë vitet e fundit në bashkinë Pogradec.
/r.e/
