TIRANË, 9 shkurt /ATSH/ Presidenti i Republikës, Ilir Meta shprehu sot shqetësimin për aksidentet dhe humbjen e jetëve të shtetasve shqiptarë në rrugët e vendit.
“Shpreh shqetësimin e thellë për rritjen e numrit të aksidenteve dhe humbjen e jetëve të shtetasve shqiptarë në rrugët e vendit”, tha Meta në një reagim.
Meta theksoi se, “sipas raporteve zyrtare, në 10 ditët e fundit kanë ndërruar jetë 10 qytetarë dhe mbi 25 janë plagosur në aksidente automobilistike në akse të ndryshme rrugore të vendit, çka përbën një bilanc tragjik të paprecedentë për numrin shumë të lartë të viktimave në këtë periudhë të vitit”.
Meta apeloi autoritetet përgjegjëse të Policisë së Shtetit dhe Ministrisë së Infrastrukturës dhe Energjetikës “të marrin masa të menjëhershme për rritjen e sigurisë rrugore, në mbrojtje të jetës së qytetarëve”.
Ai u bëri thirrje të gjithë qytetarëve “të jenë sa më të kujdesshëm në drejtimin e automjeteve të tyre dhe të zbatojnë me rigorozitet rregullat e qarkullimit rrugor”.
/r.e/
