TIRANË, 18 janar /ATSH/ Kryetarja e Kuvendit, Lindita Nikolla uroi presidenten e re të Parlamentit Evropian, Roberta Metsola.
Nikolla u shpreh e bindur se nën drejtimin e Metsolës, Parlamenti Evropian do të vazhdojë të mbështesë fuqimisht e me vendosmëri rrugëtimin evropian të Shqipërisë.
“Urime presidentes së re të Parlamentit Evropian, Roberta Metsola. Jam e bindur se, nën drejtimin e presidentes Metsola, Parlamenti Evropian do të vazhdojë të mbështesë fuqimisht e me vendosmëri rrugëtimin evropian të Shqipërisë dhe do të intensifikojë e zgjerojë bashkëpunimin me Kuvendin e Shqipërisë!”, u shpreh Nikolla.
Balla: Parlamenti Europian mbetet gjithmonë mbështetës i procesit të zgjerimit
Kryetari i grupit parlamentar të Partisë Socialiste, Taulant Balla ka uruar sot zgjedhjen e presidentes së re të Parlamentit Europian, Roberta Metsola.
Përmes një reagimi, Balla u shpreh se Parlamenti Europian mbetet gjithmonë mbështetës i procesit të zgjerimit të BE me vendet e Ballkanit Perëndimor.
“Përgëzime presidentes së sapozgjedhur të Parlamentit Europian Roberta Metsola. Parlamenti Europian mbetet gjithmonë mbështetës i procesit të zgjerimit të BE me vendet e Ballkanit Perëndimor”, u shpreh Balla.
Meta: Mirëpres bashkëpunimin e ngushtë në procesin e integrimit europian
Presidenti i Republikës, Ilir Meta uroi sot Roberta Metsolën për zgjedhjen si presidente e Parlamentit Europian.
Meta u shpreh se mirëpret bashkëpunimin e ngushtë në procesin e integrimit europian të Shqipërisë, me shpresën për çeljen sa më parë të negociatave të anëtarësimit.
“Urime të përzemërta Roberta Metsola për zgjedhjen si Presidente e Parlamentit Europian! Mirëpres bashkëpunimin e ngushtë në procesin e integrimit europian të Shqipërisë, me shpresën për çeljen sa më parë të negociatave të anëtarësimit. Jam besimplotë për vendosmërinë e saj në mbrojtje të vlerave europiane dhe forcimit të demokracisë, përfshirë dhe në të gjitha vendet e zgjerimit”, u shpreh Meta.
Xhaçka: Mirëpresim të punojmë ngushtë së bashku në këtë vit vendimtar
Ministrja për Evropën dhe Punët e jashtme, Olta Xhaçka uroi sot Roberta Metsolën për zgjedhjen si presidente e Parlamentit Europian. Xhaçka u shpreh se mezi pret të bashkëpunojë ngushtë në këtë vit vendimtar për Shqipërinë.
“Urimet më të mira për Roberta Metsola në emërimin e saj si Presidente e Parlamentit Evropian. Mirëpresim të punojmë ngushtë së bashku në këtë vit vendimtar për integrimin e Shqipërisë në BE”, u shpreh Xhaçka në një reagim.
Me një shumicë të qartë, Parlamenti Evropian votoi konservatoren Roberta Metsola si presidenten e tij të re, duke zëvendësuar David Sassoli, i cili vdiq papritur javën e kaluar.
Metsola, 43 vjeçe, vjen nga Malta dhe i përket fraksionit të qendrës së djathtë të Partisë Popullore Evropiane (EPP).
/j.p/r.e/
