TIRANË, 30 dhjetor /ATSH/ Gjykata Kushtetuese ka rrëzuar kërkesën e Pëllumb Gjokës, i cili kërkoi pavlefshmërinë e provave nga komunikimet në ‘Sky’ dhe ‘EncroChat’. Biznesmeni ndodhet në burg i arrestuar në kuadër të operacionit “Metamorfoza”.
Në njoftimin e Gjykatës Kushtetuese thuhet se mori në shqyrtim çështjen me kërkues Pëllumb Gjoka me objekt shfuqizimin e vendimeve të Gjykatës së Posaçme të Shkallës së Parë për Korrupsionin dhe Krimin e Organizuar; të Kolegjit Penal të Gjykatës së Lartë, si të papajtueshëm me Kushtetutën e Republikës së Shqipërisë, për pjesën që kanë disponuar për caktimin dhe vazhdimin e masës së sigurimit personal “Arresti në burg” ndaj kërkuesit.
Po ashtu, Gjika kishte kërkuar shfuqizimin e disa pikave të vendimit “Për organizimin dhe funksionimin e institucioneve për të luftuar korrupsionin dhe krimin e organizuar”, të ndryshuar, si të papajtueshme me Kushtetutën e Republikës Shqipërisë, për shkak se cenojnë pavarësinë dhe paanësinë e gjykatësve të posaçëm.
Në përfundim të shqyrtimit të çështjes, Gjykata vendosi, njëzëri, rrëzimin e kërkesës.
Vendimi përfundimtar do të shpallet i arsyetuar brenda afateve ligjore. /J.P/
