TIRANË, 21 dhjetor /ATSH/ Flamingot, zogjtë me qafën e hollë dhe me këmbët e hijshme, kanë “pushtuar” plazhin e Zvërnecit, në Vlorë. Kryebashkiaku i Vlorës, Ermal Dredha ka shpërndarë fotot e flamingove, duke e konsideruar këtë “një dhuratë rozë që natyra e solli në plazhin e Zvërnecit”.
Zogjtë lozonjarë që tërheqin vizitorë të shumtë në vëzhgimin e piruetave të tyre, ngrihen në fluturim herët në fillimdite dhe përshëndesin diellin në perëndimin e tij. Ata janë kthyer në një atraksion për turizmin e vëzhgimit të tyre në habitatet natyrore ku jetojnë.
Flamingot jetojnë gjithmonë në grupe, që nga grupet e vogla deri në qindra mijëra. Zogjtë ngrihen në ajër në grup dhe fluturojnë me qindra kilometra gjatë periudhës së shtegtimit. Fluturimi bëhet duke formuar radhë të gjata ose në formë V-je, derisa të arrijnë në vendmbërritjen e tyre një liqen me ujë të kripur, që është vend i shkëlqyer për të ngritur folenë e për të rritur të vegjlit. /j.p/
