TIRANË, 21 nëntor /ATSH/ Në Akademinë e Shkencave të Shqipërisë u zhvillua workshop-i “Bujqësia e zgjuar”, në bashkëpunim me Universitetin Bujqësor të Tiranës, Ministrinë e Bujqësisë dhe Zhvillimit Rural dhe Këshillin e Agrobiznesit Shqiptar.
E pranishme në këtë aktivitet të rëndësishëm për sektorin, ministrja e Bujqësisë dhe Zhvillimit Rural, Anila Denaj tha se, “përmes mbështetjes së vazhdueshme të qeverisë shqiptare dhe donatorëve si FAO dhe Banka Botërore kemi nisur punën për digjitalizimin e sektorit bujqësor, ndër të cilat edhe projekte si DART dhe KRAD.
“Nga kadastra e verës dhe ullirit, portali i fermerit që ofron informacione mbi tregjet dhe çmimet për mbi 40 produkte, duke rritur qasjen e fermerëve tanë në tregje të reja, tek sistemi LIMS për gjurmueshmërinë e produkteve ushqimore , po punojmë për modernizimin e sektorit drejt vizionit Bujqësia 2030 dhe Shqipëria 2030”, tha Denaj. /a.f/
