TIRANË, 19 nëntor/ATSH/ Drejtoria Rajonale e Trashëgimisë Kulturore Tiranë ndau në rrjetet sociale pamje nga punimet në Mozaikun e Tiranës.
“Thesari arkeologjik po merr jetë falë ndërhyrjes restauruese, për ta sjellë sërish në vëmendje të vizitorëve”, shkroi DRTK Tiranë.
Aktualisht janë drejt përfundimit rifiniturat e fundit të objektit dhe organizimi është i tillë që të mos cenojë në asnjë moment gjendjen dhe jetëgjatësinë e objekteve arkeologjike.
Mozaiku i Tiranës është një monument arkeologjik me rëndësi të madhe historike dhe artistike. Ai daton nga periudha e shekullit të III-IV pas Krishtit dhe është një nga dëshmitë e rralla të ekzistencës së një vile romake ose ndërtese të ngjashme në atë kohë, në zonën e Tiranës. /j.p/
