TIRANË, 24 shtator/ATSH/ Kryetari i Partisë Demokratike, Sali Berisha deklaroi sot se “Shqipëria ka qenë dhe do të mbetet shteti, vendi i harmonisë së shkëlqyer fetare”.
Gjatë fjalës së tij në tubimin qytetar, Berisha tha se “Shqipëria do të mbetet shteti laik që respekton besimin e tjetrit. Fetë e shqiptarëve, myslimanët, të krishterët, janë gurra të pashtershme hyjnore që ushqejnë dhe pasurojnë shpirtrat e shqiptarëve, por jo shpirtrat e katranove si Edi Rama, që përdor edhe fetë për qëllime mafioze, për qëllime antishqiptare”.
“Prandaj, miqtë e mi, protesta, revolta, mosbindja civile është thirrja për të shpëtuar kombin shqiptar. Është kushtrimi i shqiptarëve për të rikthyer Shqipërinë në rrugën e demokracisë. Për të dalë me shpejtësi nga varfëria. Për të rikthyer shtetin ligjor.
Për të shndërruar pasuritë përrallore të shqiptarëve në mirësi dhe të mira për qytetarët e këtij vendi”, tha Berisha.
Berisha u shpreh se, “ju garantoj, se forcë në botë që t’i rezistojë vrullit, hovit, zemërimit, revoltës popullore opozitare të shqiptarëve kundër regjimit nuk ka dhe nuk mund të ketë”.
/k.s/r.e/a.f/
