TIRANË, 16 korrik/ATSH/ Kryetarja e Kuvendit, Lindita Nikolla uroi sot Presidenten e Parlamentit Europian, Roberta Metsola për rizgjedhjen në detyrë.
Nikolla shpreh bindjen se bashkëpunimi mes Kuvendit të Shqipërisë dhe Parlamentit Europian do të intensifikohet.
Po ashtu kryeparlamentarja u shpreh optimiste se Shqipëria do të avancojë shumë shpejt drejt anëtarësimit në BE.
“Urime Roberta Metsola për rizgjedhjen Presidente e Parlamentit Europian. Jam e bindur se bashkëpunimi mes Kuvendit të Shqipërisë dhe Parlamentit Europian do të intensifikohet dhe Shqipëria do të avancojë shumë shpejt drejt anëtarësimit në BE”, shkruan Nikolla në mesazhin e urimit.
Parlamenti Evropian zgjodhi sot Roberta Metsola për një mandat tjetër si presidente, me 562 vota në favor të saj.
Votimi për të rizgjedhur Metsola për dy vjet e gjysmë të tjera u zhvillua në seancën e parë të mandatit të ri të legjislaturës së BE-së në selinë e parlamentit në qytetin lindor francez, Strasburg.
Kundërshtarja e saj Irene Montero, e propozuar nga grupi parlamentar i Majtë, mori vetëm 61 vota.
Metsola është gruaja e tretë që mban këtë detyrë. Presidentet e mëparshme gra të Parlamentit Evropian përfshijnë Nicole Fontaine të Francës dhe të mbijetuarën e Holokaustit Simone Veil. /m.m/
