TIRANË, 5 korrik/ATSH/ Policia e Elbasanit ndihmoi 2 turistë çekë të cilët denoncuan humbjen e dokumentit të identifikimit.
Sipas njoftimit të policisë, “mbrëmjen e djeshme, pas një telefonate nga një turist çek që kërkonte ndihmë sepse i kishte humbur dokumenti i identifikimit, gjatë kohës që lëvizte me biçikletë, bashkë me një turiste tjetër çeke, në aksin rrugor “Elbasan-Librazhd”, shërbimet e Policisë iu kanë shkuar në ndihmë 2 turistëve dhe së bashku me ta kanë kërkuar përgjatë itinerarit të lëvizjes, por nuk kanë mundur ta gjejnë dokumentin e identifikimit”.
Më pas, turistët janë mirëpritur në ambientet e Komisariatit të Policisë Elbasan dhe turisti që kishte humbur dokumentin e identifikimit u pajis me vërtetim për humbje dokumenti, dokument që mund ta përdorë për të marrë shërbime në Republikën e Shqipërisë dhe për kalimin në pikat kufitare.
Punonjësit e Policisë i kanë shoqëruar turistët në vendin e tyre të akomodimit. Turistët çekë kanë falënderuar punonjësit e Policisë për ndihmën e ofruar. Policia e Elbasanit apelon për të gjithë qytetarët, që nëse gjejnë dokumente apo sende të tjera personale të turistëve apo vizitorëve, t’i dorëzojnë ato në Polici ose të telefonojnë në numrin 112.
