TIRANË, 25 qershor/ATSH/ Një grup pune nga Enti Rregullator i Ujit (ERRU) morën pjesë sot në tre seanca dëgjimore me konsumatorët e qyteteve Maliq, Pustec e Devoll, të organizuara nga Shoqëria Rajonale UK Korçë në lidhje me propozimin që pritet të dorëzojë pranë ERRU për ndryshim të nivelit tarifor për shërbimet ujësjellës kanalizime.
Në praninë e përfaqësuesve nga pushteti lokal dhe konsumatorëve, kryesisht familjarë, drejtorja tregtare pranë Ujësjellës Kanalizime, Korçë, Frosela Filo prezantoi nivelin e ri të tarifave.
Sipas saj, ky nivel tarifor erdhi si një domosdoshmëri me qëllim rritjen e cilësisë së shërbimit që ju ofrohet konsumatorëve, për të përmirësuar treguesit e performancës së shoqërisë dhe arritjen e objektivave që kanë vendosur për t’i realizuar në të ardhmen e afërt.
Zhvillimi i seancës dëgjimore me publikun është një ndër kushtet kryesore që duhet të përmbushin shoqëritë përpara se të paraqesin propozimin me nivelin e ri tarifor.
/r.e/
