LONDËR, 17 maj /ATSH-DPA/- Ndihma e Britanisë së Madhe ka mbërritur në Gazë si pjesë e dërgesës së parë duke përdorur një skelë të përkohshme në brigjet e rajonit.
Kryeministri britanik Rishi Sunak tha se dorëzimi i 8400 strehimoreve plastike të përkohshme ishte pjesë e një përpjekjeje të përbashkët ndërkombëtare për të krijuar një rrugë detare për ndihmat në Gazë.
Më shumë ndihma britanike pritet të shpërndahen përmes skelës, e ndërtuar nga forcat e armatosura amerikane, në javët e ardhshme.
Por, ministrat theksuan se nevojitet punë e mëtejshme për të dorëzuar ndihmat në Gazë, veçanërisht duke përdorur rrugët tokësore.
Sekretari i Jashtëm britanik, David Cameron tha se rruga detare ishte vetëm një pjesë e tablosë më të madhe dhe rrugët tokësore ishin mjetet më efektive për të dërguar ndihmat në Gazë në shkallën e nevojshme.
“Qytetarët në Gazë janë në rrezik urie dhe në nevojë të dëshpëruar për furnizime – Izraeli duhet të sigurojë që rrugët tokësore të jenë të hapura dhe që ndihma të arrijë në mënyrë të sigurt atje ku është e nevojshme”, shtoi Cameron.
Britania e Madhe ka luajtur një rol mbështetës në ndërtimin e skelës, e cila u ankorua në breg të enjten, duke siguruar strehim për personelin amerikan në anijen ndihmëse të Flotës Mbretërore, “Cardigan Bay”. //a.i/
