UASHINGTON, 23 shkurt /ATSH-ANSA/ – Presidenti amerikan, Joe Biden u takua në San
Francisko me të venë dhe vajzën e Alexei Navalnyt, njoftoi Shtëpia e Bardhë.
Biden takoi Yulia dhe Dasha Navalnaya sot në San Francisko “për të shprehur ngushëllimet e tij më të thella për humbjen e tyre të tmerrshme”, thuhet në një shënim nga Shtëpia e Bardhë.
Ajo nënvizoi se presidenti “shprehu admirimin e tij për të guximin e jashtëzakonshëm të Navalnyt në luftën kundër korrupsionit dhe për një Rusi të lirë dhe demokratike”.
Biden theksoi se trashëgimia e këtij opozitari të madh do të vazhdojë “përmes njerëzve në të gjithë Rusinë dhe në mbarë botën që vajtojnë humbjen e tij dhe luftojnë për lirinë, demokracinë dhe të drejtat e njeriut”.
Presidenti kujtoi se sot do të shpallë sanksione të reja të rënda kundër Moskës./ a.jor.
