TIRANË, 16 shkurt/ATSH/ Ministri i Punëve të Brendshme të Kosovës, Xhelal Sveçla bën të ditur se selia qendrore e INTERPOL-it e ka njoftuar se janë futur në sistemin e urdhërarrestit ndërkombëtar të gjithë personat e dyshuar që realizuan sulmin terrorist të 24 shtatorit në Banjskë të Zveçanit.
Lajmi bëhet i ditur nga KosovaPress.
Ministri Sveçla tha se ky është një hap i rëndësishëm dhe si i tillë ka efektin e plotë atëherë kur Serbia e cila sipas tij është duke strehuar dhe akomoduar terroristët, i dorëzon tek autoritet e Kosovës për t’u përgjigjur para drejtësisë.
“Llogaridhënia për organizimin dhe realizimin e sulmit terrorist të 24 shtatorit, ku mbeti i vrarë rreshter Afrim Bunjaku, është e domosdoshme. Ndëshkimi për urdhërdhënësit, organizatorët dhe ekzekutuesit e këtij sulmi duhet të ndodhë sa më parë, si garancë e mos përsëritjes së akteve të ngjashme terroriste”, shkroi Sveçla.
Më 6 dhjetor të vitit të kaluar, INTERPOL-i pati lëshuar urdhërarrest ndërkombëtar për terroristin Milan Radoiçiç, i cili pati deklaruar se kishte udhëhequr sulmin terrorist të 24 shtatorit.
