TIRANË, 15 shkurt /ATSH/ Kuvendi u mblodh sot në seancë plenare dhe miratoi një sërë projektligjesh të rëndësishme, ndërkohë që deputetët e opozitës në sallë vijuan qëndrimin bllokues.
Kuvendi miratoi me 72 vota pro projektligjin “Për disa shtesa dhe ndryshime në ligjin “Për lojërat e fatit në Republikën e Shqipërisë”, te ndryshuar.
Gjithashtu me 74 vota pro u miratua projektligji “Per një shtesë në ligjin “Për festat zyrtare e ditët perkujtimore”, të ndryshuar.
Ndërsa u miratuan edhe dy projektvendime: “Për disa ndryshime në vendimin e Kuvendit “Për miratimin e strukturës, organikës dhe kategorizimit të pozicioneve të punës të Institutit të Statistikave, INSTAT” dhe “Për miratimin e strukturës organizative, organikës dhe klasifikimit të pagave të punonjësve me kohë jo të plotë të Komisionit Qendror të Zgjedhjeve”.
Në rend të ditës ishte parashikuar edhe interpelanca e kërkuar nga deputetë e PD-së me kryeministrin Edi Rama.
Kryetarja e Kuvendit njoftoi se për shkak të agjendës jashtë vendit, këtë detyrë kryeministri Rama ia ka deleguar ministres së Shtetit për Marrëdhëniet me Parlamentin, Elisa Spiropali.
PD kërkoi praninë e Ramës, duke thënë se ai nuk mund të fshihet pas Blinken dhe Spiropalit. Pasi u kalua në votim, Basha me grupin e tij të deputetëve u larguan nga salla.
