TIRANË, 23 janar/ATSH/ Një grup fermerësh bllokuan këtë mëngjes rrugën në Levan të Fierit, në një protestë kundër uljes së çmimit të qumështit.
Në një reagim për medie, deputeti i PD-së Luan Baçi siguroi blegtorët, nga Fieri, Vlora dhe nga gjithë Shqipëria për mbështetjen e pakursyer të Partisë Demokratike.
“Protesta e blegtorëve nuk është shfaqje nga ato që bën qeveria, por klithmë nevoje. Është nxitur nga ulja drastike e çmimeve të qumështit nga fabrikat përpunuese, nga 180 lekë për litër vjet, në vetëm 120 lekë për litër sot. Kjo ka sjellë një krizë mbijetese për blegtoret, duke i detyruar disa prej tyre të mbyllin bizneset ose të therin tufat”, u shpreh ai.
Baçi theksoi se blegtorët kanë paralajmëruar për intensifikimin e protestave, përfshirë bllokimin e rrugëve dhe refuzimin demonstrativ të dorëzimit të qumështit dhe PD do t’i mbështesë.
“Beteja e çdo shqiptari për jetë më të mirë dhe dinjitet është edhe betejë e Partisë Demokratike”, tha ai.
/m.m/
