VARSHAVË, 12 dhjetor /ATSH-ANSA/ – Polonia do të jetë një aleate e fortë e Shteteve të Bashkuara të Amerikës dhe do të veprojë si një lidhje kyçe në Paktin Atlantik, ndërkohë që do të rimarrë një pozitë udhëheqëse në Bashkimin Evropian, deklaroi kryeministri i ri polak, Donald Tusk në fjalimin e tij para 460 deputetëve të parlamentit.
Tusk njoftoi fundin e izolimit të vendit të tij në arenën ndërkombëtare dhe premtoi bashkëpunim me vendet e tjera në fusha të ndryshme.
”Ju garantoj se do të kthehemi në vendin që i takon në fushë të Bashkimit Evropian”, tha kryeministri duke ftuar të gjithë deputetët për të “riformatuar pozicionin e Polonisë në botë”.
Ministri i ri i Jashtëm do të jetë eurodeputeti Radoslaw Sikorski, ish-kreu i diplomacisë polake midis 2007-2014.
Ndër vizitat e para jashtë vendit, Tusk njoftoi praninë e tij në Bruksel për samitin evropian dhe në Talin të Estonisë për një takim me kryeministrat e vendeve baltike.
Kontaktet e radhës do të jenë me Finlandën, Suedinë dhe Norvegjinë për konsultime mbi garancitë ndërkombëtare të sigurisë kërcënuar nga lufta e vazhdueshme./ /os/
