TIRANË, 5 dhjetor/ATSH/ Biblioteka Kombëtare çeli një ekspozitë për nder të nobelistit të famshëm francez Alber Camus. Ekspozita vjen në 110-vjetorin e lindjes së nobelistit dhe risjell në vëmendje krijimtarinë e shkrimtarit dhe të filozofit të mirënjohur francez, botuar në gjuhën shqipe.
Romani i mirënjohur “I huaji”, është libri i parë i botuar nga bota e lirë në Shqipërinë postkomuniste, rreth 32 vite më parë, më pas do të vijonin të përktheheshin veprat e tij më të rëndësishme, si: “Miti i Sizifit”, “Murtaja”, “Para gijotinës”, “Rënia”, “Kaligula”, “Gruaja kurorëshkelëse”, “Zhonai ose artisti në punë”, “Mërgimi dhe mbretëria”, “Vera në Algjer”, “E prapmja dhe e përparmja”, “Martesa pasuar nga vera” etj.
Krahas botimeve në Shqipërinë postkomuniste vijnë edhe botimet e Prishtinës. Një vend të veçantë në këtë ekspozitë zënë botimet në gjuhën franceze të Camus, të cilat janë pjesë e fondit të BKSH-së.
Ekspozita do të qëndrojë e hapur për publikun në Sallën Shkencore të BKSH-së.
/r.e/
