LONDËR, 11 tetor /ATSH-DPA/ – Mbreti Charles III i Britanisë së Madhe është i tmerruar dhe dënon aktet barbare të terrorizmit në Izrael, tha “Buckingham Palace”.
Charles thuhet se është jashtëzakonisht i shqetësuar për situatën dhe ka kërkuar që të informohet në mënyrë aktive pas sulmeve të Hamasit.
Një zëdhënës i Pallatit tha se mendimet dhe lutjet e monarkut ishin me të gjithë ata që vuajnë, veçanërisht ata që kishin humbur të dashurit.
Izraeli është zotuar për një hakmarrje të paprecedentë kundër grupit militant palestinez Hamas, pasi luftëtarët e tij sulmuan përmes gardhit kufitar të shtunën dhe qëlluan qindra izraelitë në shtëpitë e tyre, në rrugë dhe në një festival muzikor në natyrë.
Qeveria izraelite ka nisur një kundërpërgjigje të madhe të sulmeve ajrore në Gaza dhe ka ndaluar furnizimet e ushqimit, ujit, karburantit dhe ilaçeve në territor.
Konflikti ka shkaktuar vdekjen e të paktën 2 100 personave nga të dyja palët, me frikën se mund të përshkallëzohet më tej.
Charles, si Princi i Uellsit, kreu vizitën e tij të parë zyrtare në Izrael dhe Territoret Palestineze në vitin 2020. //a.i/
