JERUSALEM, 8 tetor /ATSH-AFP/ – SHBA, evropianët dhe shumë kryeqytete në mbarë botën dënuan fuqishëm sulmet e Hamasit kundër Izraelit. Rusia dhe Kina, nga ana e tyre, u bënë thirrje të dyja palëve për përmbajtje dhe armëpushim dhe Irani mirëpriti ofensivën palestineze:
SHBA
Joe Biden këmbënguli se mbështetja e Shteteve të Bashkuara për Izraelin ishte “e vendosur dhe e palëkundur”.
“Sot, populli i Izraelit është nën sulm nga një organizatë terroriste, Hamasi. Në këtë moment tragjik, dua t’u them atyre, botës dhe terroristëve kudo që janë: Shtetet e Bashkuara qëndrojnë përkrah Izraelit. Ne kurrë nuk do të dështojmë të mbështesim ata”, shtoi presidenti amerikan.
Pentagoni tha se do të siguronte që Izraeli të ketë “atë që i nevojitet për të mbrojtur veten”.
BE
Presidentja e Komisionit Evropian Ursula von der Leyen dënoi sulmet që përbëjnë “terrorizëm në formën e tij më të neveritshme” dhe konsideroi se Izraeli kishte “të drejtën për të mbrojtur veten”.
Kreu i diplomacisë evropiane, Josep Borrell, denoncoi marrjen peng “të tmerrshme” të civilëve dhe bëri thirrje për lirimin e tyre “të menjëhershëm”. Ai shprehu “solidaritetin” e BE-së me Izraelin.
Presidenti i Këshillit Evropian, Charles Michel, gjithashtu kritikoi “sulmet pa dallim kundër Izraelit dhe popullit të tij (…), duke shkaktuar terror dhe dhunë mbi qytetarët e pafajshëm”.
OKB
Sekretari i Përgjithshëm i OKB-së, Antonio Guterres tha se ai dënoi “në termat më të ashpër të mundshëm sulmin këtë mëngjes nga Hamasi mbi qytetet izraelite”. Ai i kërkoi komunitetit ndërkombëtar që të bëjë “përpjekje diplomatike për të shmangur zgjerimin e zjarrit” midis Izraelit dhe Hamasit.
I dërguari i OKB-së për Lindjen e Mesme, Tor Wennesland, dënoi “sulmet e neveritshme” të Hamasit kundër Izraelit dhe bëri thirrje për përfundimin “i menjëhershëm” të tyre, duke specifikuar se ai ishte në kontakt me të gjitha palët për t’u kërkuar atyre veçanërisht “të mbrojnë civilët”.
Kina
“Kina është thellësisht e shqetësuar për përshkallëzimin aktual të tensioneve dhe dhunës midis Palestinës dhe Izraelit dhe u bën thirrje të gjitha palëve të interesuara të qëndrojnë të qetë dhe të ushtrojnë përmbajtje, të pushojnë menjëherë zjarrin, të mbrojnë civilët dhe të parandalojnë përkeqësimin e mëtejshëm të situatës”, tha Ministria e Jashtme kineze. në një deklaratë.
Rusia
Moska shprehu shqetësimin për një “përkeqësim të papritur të situatës në zonën e konfliktit izraelito-palestinez”.
“Ne u bëjmë thirrje palëve palestineze dhe izraelite për një armëpushim të menjëhershëm, të heqin dorë nga dhuna dhe të tregojnë përmbajtjen e nevojshme”, tha në një deklaratë zëdhënësja diplomatike ruse Maria Zaharova.
Zëvendësministri i Jashtëm rus dhe i dërguari i Kremlinit për Lindjen e Mesme dhe Afrikën, Mihail Bogdanov, tha se ai ishte “në kontakt” me të gjitha palët e interesuara.
Irani
Një këshilltar ushtarak i udhëheqësit suprem të Iranit, Ayatollah Ali Khamenei, e përshëndeti ofensivën dhe tha se “ne mbështesim këtë operacion krenar… dhe jemi të sigurt se fronti i rezistencës pranë Iranit kundër Izraelit gjithashtu e mbështet atë”, njoftoi gjenerali i Gardës Revolucionare, Yahya Rahim-Safavi, cituar nga agjencia ISNA.
Katari
Katari u bëri thirrje të gjitha palëve që të “ushtrojnë përmbajtjen maksimale”. Ministria e Jashtme tha se “e konsideron Izraelin vetëm përgjegjës për përshkallëzimin aktual për shkak të shkeljeve të tij të vazhdueshme”, duke i bërë thirrje komunitetit ndërkombëtar që “të parandalojë që këto ngjarje të përdoren si pretekst për të ndezur zjarrin e një lufte të re të pabarabartë kundër civilëve palestinezë”.
Turqia
Presidenti Recep Tajip Erdogan u bëri thirrje izraelitëve dhe palestinezëve që të “veprojnë në mënyrë të arsyeshme” dhe “të përmbahen nga veprimet impulsive, gjë që do të rriste tensionet”.
Ukraina
“E drejta e Izraelit për të mbrojtur veten është e padiskutueshme”, u përgjigj presidenti ukrainas Volodymyr Zelensky, vendi i të cilit po përballet me një pushtim nga ushtria ruse. “Terrori është gjithmonë një krim, jo vetëm kundër një vendi apo viktimave specifike, por kundër njerëzimit në tërësi”, shtoi ai.
Egjipti
Ministria e Jashtme u bëri thirrje në një deklaratë “si palestinezëve ashtu edhe izraelitëve që të ushtrojnë përmbajtjen maksimale” dhe paralajmëroi “rrezikun serioz të përshkallëzimit të vazhdueshëm”.
Brazili
“Qeveria braziliane dënon serinë e të shtënave dhe sulmeve të kryera sot në Izrael nga Rripi i Gazës”, tha Ministria e Jashtme në një deklaratë, duke bërë thirrje për “përmbajtje maksimale” nga palët në konflikt për të “shmangur përshkallëzimin”.
Vendi, i cili aktualisht mban presidencën e Këshillit të Sigurimit të OKB-së, njoftoi se do të thërriste “një takim urgjent të organizatës”.
India
Kryeministri indian Narendra Modi tha se ishte “thellësisht i tronditur” nga sulmi, duke treguar se vendi i tij ishte “në solidaritet me Izraelin”.
Franca
Presidenti Emmanuel Macron “dënon fuqishëm sulmet terroriste që godasin aktualisht Izraelin” dhe shprehu “solidaritetin e tij të plotë” me viktimat.
Parisi gjithashtu “riafirmoi refuzimin e tij absolut të terrorizmit dhe lidhjen e tij me sigurinë e Izraelit”.
BM
“Nuk ka ‘luftëtarë’ të Hamasit. Nuk ka ‘militantë’ të Hamasit. Ata janë terroristë”, deklaroi Sekretari i Jashtëm britanik, duke denoncuar “sulmet e tmerrshme të Hamasit kundër civilëve” izraelitë.
Nga ana e tij, kreu i qeverisë Rishi Sunak nënvizoi “të drejtën absolute” të Izraelit “për të mbrojtur veten”.
Gjermania
Berlini “dënoi fuqishëm sulmet terroriste që vijnë nga Gaza kundër Izraelit”, duke theksuar rrezikun e “përshkallëzimit të madh rajonal”.
Japonia
Japonia “dënon fuqishëm” sulmet e Hamasit dhe rrëmbimet e civilëve izraelitë, sipas një deklarate nga Ministria e Jashtme. “Në të njëjtën kohë, ne jemi seriozisht të shqetësuar për numrin e madh të viktimave në Rripin e Gazës si rezultat i sulmeve nga Forcat e Mbrojtjes izraelite. Japonia u bën thirrje edhe një herë të gjitha palëve të ushtrojnë përmbajtje maksimale”./ a.jor.
